മുംബൈ: റിസര്വ് ബാങ്ക് ഓഫ് ഇന്ത്യ താമസിയാതെ ഡിജിറ്റല് കറന്സി അവതരിപ്പിക്കും. ലക്ഷ്മി എന്ന പേരിലാകും ഇത് ഇറക്കുക. മറ്റു രാജ്യങ്ങളിലെ കേന്ദ്രബാങ്കുകളും ഡിജിറ്റല് കറന്സി അവതരിപ്പിക്കാന് ഉദ്ദേശിക്കുന്നുണ്ട്.
ബിറ്റ്കോയിന് പോലുള്ള ഗൂഢകറന്സികള് നിരോധിച്ചത് അതിന്റെ തുടക്കമായി പറയപ്പെടുന്നു. ബിറ്റ്കോയിനും മറ്റും പണകൈമാറ്റത്തിനു സഹായിച്ചിരുന്ന ബാങ്കുകള്ക്കും പേമെന്റ് സംവിധാനങ്ങള്ക്കും അതില്നിന്നു പിന്മാറാന് മൂന്നു മാസമാണു റിസര്വ് ബാങ്ക് അനുവദിച്ചിട്ടുള്ളത്.
ഡിജിറ്റല് കറന്സി നടപ്പാക്കുന്നതിനെപ്പറ്റി പഠിക്കാന് റിസര്വ് ബാങ്ക് ഒരു കമ്മിറ്റിയെ നിയോഗിച്ചിട്ടുണ്ട്. കഴിഞ്ഞ വര്ഷം ബാങ്ക് ഓഫ് കാനഡ ഈ വിഷയം വിശദമായി പഠിച്ച് ഒരു റിപ്പോര്ട്ട് തയാറാക്കിയിരുന്നു. 2016 മുതല് വിവിധ കേന്ദ്രബാങ്കുകള് ഇക്കാര്യം പഠിച്ചുവരികയാണ്.
ടെക്നോളജി ഭദ്രം
ബ്ലോക്ക് ചെയിന് ടെക്നോളജി അഥവാ ഡിസ്ട്രിബ്യൂട്ടഡ് ലെഡ്ജര് ടെക്നോളജി (ഡിഎല്ടി) ഉപയോഗിച്ചാണു ബിറ്റ്കോയിനും മറ്റും പ്രവര്ത്തിക്കുന്നത്. വളരെ വലിയ നെറ്റ്വര്ക്കില് പ്രവര്ത്തിക്കുന്ന ഇത് ഓരോ സ്വതന്ത്ര കംപ്യൂട്ടറിലും(നോഡ്)നിന്ന് ഓപ്പറേറ്റ് ചെയ്യാം. പണം, ഓഹരി, മ്യൂച്വല് ഫണ്ട് തുടങ്ങി ആസ്തികളുടെ കണക്ക് ഭദ്രമായി സൂക്ഷിക്കാവുന്ന സംവിധാനമാണിത്. ഓരോ ഇടപാടിനും സാക്ഷികളുണ്ടാകും. അതിനാല് ചോര്ത്തല് സാധ്യതയില്ല. ഒരു കേന്ദ്രസെര്വറില് അല്ലാതെ ധാരാളം സ്വതന്ത്ര കംപ്യൂട്ടറുകളില് വിവരങ്ങള് ഒരേസമയം സൂക്ഷിക്കുന്നതിനാല് "ആക്രമണം' വിഫലമാകും. ഈ സാങ്കേതികവിദ്യ ഉപയോഗിച്ച് ഡിജിറ്റല് കറന്സി ഉണ്ടാക്കിയാല് അതു ഭദ്രമായിരിക്കും എന്നാണു നിഗമനം. ലോകബാങ്ക് ഈ ജനുവരി 23ന് ഈ സാങ്കേതികവിദ്യ ശിപാര്ശ ചെയ്യുന്ന ഒരു റിപ്പോര്ട്ട് പുറത്തിറക്കിയിരുന്നു.
കേന്ദ്രബാങ്ക് ഇറക്കിയാല്
ഇപ്പോള് സ്വകാര്യ ഗ്രൂപ്പുകള് ഇറക്കുന്ന ഗൂഢ(ക്രിപ്റ്റോ) കറന്സികള്ക്ക് ഭദ്രതയും സുരക്ഷിതത്വവും ഉറപ്പുനല്കുന്ന ഒരു കേന്ദ്ര അധികാരസ്ഥാപനമില്ല. ബിറ്റ്കോയിന്റെ പിന്നില് ആരാണുള്ളതെന്നുപോലും അറിയില്ല. അതില് നിക്ഷേപിക്കുന്ന പണത്തിന്റെ ഭദ്രത ഉറപ്പുവരുത്താനും മാര്ഗമില്ലായിരുന്നു.
കേന്ദ്രബാങ്കുകള് ഡിജിറ്റല് കറന്സി ഇറക്കുന്പോള് ഭദ്രതയും സുരക്ഷിതത്വവും സംബന്ധിച്ച ആശങ്ക ഇല്ലാതാകും.
ബിറ്റ്കോയിന് പോലെ "ഖനനം ചെയ്തെടുക്കുന്ന' ഒന്നാവില്ല കേന്ദ്രബാങ്കുകളുടെ ഡിജിറ്റല് കറന്സി. വ്യക്തികളുടെയും സ്ഥാപനങ്ങളുടെയും പണകൈമാറ്റത്തിനുള്ള ഒരുപാധിയായിരിക്കും ഇത്. ബിറ്റ്കോയിനും എര്തേറിയവും മറ്റും ഊഹക്കച്ചവടക്കാരുടെ നിക്ഷേപ ഇടങ്ങളായിരുന്നു. കേന്ദ്രബാങ്ക് ഇറക്കുന്പോള് അത് ഊഹക്കച്ചവടത്തിനുള്ളതാവില്ല. ആസ്തി എളുപ്പം കൈകാര്യം ചെയ്യാവുന്ന ഒരു ഇലക്ട്രോണിക് ലെഡ്ജര് ആയിരിക്കും. ബാങ്ക് അക്കൗണ്ട് പോലെ പ്രവര്ത്തിക്കാവുന്ന ഒന്ന്.
കറന്സിക്കു പകരം
ഇതുവഴി കേന്ദ്ര ബാങ്കുകള്ക്കു കിട്ടുന്ന നേട്ടം കറന്സി അച്ചടി കുറയ്ക്കാം എന്നതാണ്. ലോഹക്കഷണങ്ങളില്നിന്നു കടലാസ് കറന്സിയിലേക്കു മാറിയതുപോലെ കടലാസില്നിന്ന് ഇലക്ട്രോണിക് കണക്കുബുക്കിലേക്കു മാറുന്നു. ഓഹരികളുടെ സര്ട്ടിഫിക്കറ്റുകള്ക്കു പകരം ഡീമാറ്റ് (ഇലക്ട്രോണിക്) അക്കൗണ്ട് ലഭിച്ചതുപോലൊരു മാറ്റം.
ബാങ്കിംഗിനും മാറ്റം
കറന്സിക്കു പകരം ഇതു വരുന്നതോടെ ബാങ്കിംഗിന്റെ രൂപഭാവങ്ങള് മാറും. കടലാസ് കറന്സി ഉപയോഗം തീരെ കുറവാകും. ബാങ്കുമായി ബന്ധപ്പെടാതെ വ്യക്തികള്ക്കു പണകൈമാറ്റം സാധിക്കും. അതേസമയം കള്ളപ്പണം ഉണ്ടാവുകയുമില്ല. ബാങ്കില് നിക്ഷേപിക്കുന്നതു പലിശയ്ക്കുവേണ്ടി മാത്രമാകും. പണം സൂക്ഷിക്കാന് ബാങ്ക് ആവശ്യമില്ലാതാകും. ബാങ്കിലേക്കു നിക്ഷേപം ആകര്ഷിക്കാന് ഏറെ പ്രയാസം നേരിടും.
