കുറെനാളായി ഒളിഞ്ഞും തെളിഞ്ഞും ബിറ്റ്‌കോയിനെ പറ്റി കേള്‍ക്കുന്നുണ്ടെങ്കിലും വ്യാപകമായി ഒരു വാര്‍ത്തയുമായി കെട്ടുപിണഞ്ഞ് കേട്ടത് ഇത് ആദ്യം.
കറന്‍സിയുമായി ബന്ധപ്പെട്ട അനവധി വാര്‍ത്തകളിലൂടെയാണ് നമ്മള്‍ കടന്ന് പോകുന്നത്. രൂപയുടെ കയറ്റിറക്കം, കറന്‍സി പിന്‍വലിക്കല്‍ അങ്ങനെയങ്ങനെ. അവസാനമായി ഇതാ വാനാക്രൈ കമ്പ്യൂട്ടര്‍ വ്യൂഹാക്രമണ സമയത്ത് മോചനദ്രവ്യം ആവശ്യപ്പെട്ടത് ബിറ്റ്‌കോയിനിലും. കുറെനാളായി ഒളിഞ്ഞും തെളിഞ്ഞും ബിറ്റ്‌കോയിനെ പറ്റി കേള്‍ക്കുന്നുണ്ടെങ്കിലും വ്യാപകമായി ഒരു വാര്‍ത്തയുമായി കെട്ടുപിണഞ്ഞ് കേട്ടത് ഇത് ആദ്യം. എന്താണ് ഈ ബിറ്റ്‌കോയിന്‍? രാജ്യാതിര്‍ത്തികള്‍ ബാധകമല്ലാത്ത, ഡിജിറ്റല്‍ വിവര ശൃംഖലയില്‍ മാത്രം ലഭ്യമാകുന്ന വിനിമയമൂല്യവും വിശ്വാസ്യതയും ഉള്ള നാണയവ്യവസ്ഥ എന്ന് പറയാം. സാധാരണ നാണയങ്ങളും കറന്‍സി നോട്ടും ഇറക്കുന്നത് അതാത് രാജ്യത്തെ കേന്ദ്രബാങ്കോ സര്‍ക്കാരോ ഒക്കെ ആണെങ്കില്‍ ബിറ്റ്‌കോയിന്‍ അങ്ങനെ ഒരു കൃത്യമായ അധികാര രൂപത്തിന്റെ ഭാഗമല്ല, തികച്ചും വികേന്ദ്രീകൃതമായ എന്നാല്‍ അതീവ സുരക്ഷയും വിപുലമായ സാധ്യതകളും ഉള്ള ഒരു കറന്‍സി അഥവാ നാണയം എന്ന് പറയാം.
ബിറ്റ്‌കോയിന്‍ എന്ന ക്രിപ്‌റ്റോകറന്‍സി
ക്രിപ്‌റ്റോഗ്രാഫി സങ്കേതം ഉപയോഗിക്കുന്നതിനാല്‍ ഇതിനെ ക്രിപ്‌റ്റോകറന്‍സി എന്നും വിളിക്കുന്നുണ്ട്, പല ക്രിപ്‌റ്റോകറന്‍സിയില്‍ ഒന്നാണ് നമ്മുടെ ബിറ്റ്‌കോയിന്‍. സാധാരണ കറന്‍സിയ്ക്ക് ദേശപരമായ നിലനില്‍പ്പ് ഉള്ളതിനാല്‍ തന്നെ ബന്ധിത പ്രശ്‌നങ്ങളും ഉണ്ട്. അതിര്‍ത്തികടന്നുള്ള കൊടുക്കല്‍ വാങ്ങലുകള്‍ക്ക് അതാത് സമയത്തെ മൂല്യം, അതാത് കറന്‍സിയുടെ പരിശോധനയും അത് കള്ളനല്ല എന്ന് ഉറപ്പാക്കലും ഒക്കെ കടല്‍ കടന്നുള്ള ഏര്‍പ്പാടുകള്‍ അത്ര സുഗമമല്ലാതാക്കുന്നു. ലോകം അത്രമേല്‍ ഇന്റര്‍നെറ്റ്‌വല്‍ക്കരിക്കപ്പെടുന്നത് കൊണ്ടും, സാധാരണ വ്യക്തിയുടെ ക്രയവിക്രയങ്ങളില്‍ വരെ പലരാജ്യങ്ങള്‍ കടന്ന് വരുന്നത് കൊണ്ടും ലോകത്താകമാനം വളരെ എളുപ്പത്തില്‍ ഉപയോഗിക്കാന്‍ പറ്റുന്ന സുരക്ഷിതമായ ഒരു നാണയ വ്യവസ്ഥയ്ക്ക് സ്വാഭാവികമായും സ്വീകാര്യത വരും എന്നതില്‍ തര്‍ക്കമില്ല. ഈ സമകാലിക സാഹചര്യത്തിലാണ് ബിറ്റ്‌കോയിന്റെ പ്രസക്തിയും പ്രാധാന്യവും.
തുടക്കം: സതോഷി നകോമോട്ടോ എന്ന വ്യക്തിയാണ് ഇത് ആരംഭിച്ചതെന്ന് കരുതപ്പെടുന്നു. ഇത് അയഥാര്‍ത്ഥ വ്യക്തിയാണ് നാളിതുവരെ നേരില്‍ പ്രത്യക്ഷപ്പെട്ടിട്ടില്ലങ്കിലും ബിറ്റ്‌കോയിന്റെ ഉപജ്ഞാതാവ് ഈ നാമം തന്നെ എന്ന് വിശ്വസിക്കപ്പെടുന്നു. ആരംഭിച്ച ആളിന്റെ കാര്യത്തില്‍ ആശയക്കുഴപ്പം ഉണ്ടെങ്കിലും ഇതിന്റെ വിശ്വാസ്യത ബ്ലോക്ക് ചെയിന്‍ എന്ന സങ്കേതത്തില്‍ അധിഷ്ഠിതമാണ്. അതാകട്ടെ നിലവിലുള്ള കറന്‍സി അച്ചടിക്കുന്ന സംവിധാനത്തെക്കാളും പതിന്മടങ്ങ് വിശ്വാസ്യതയും സുരക്ഷിതത്വവും കൂടാതെ നോട്ടക്കണക്കും ഉള്ളതാണ്. എന്ന് വച്ചാല്‍ കള്ളനോട്ടിന്റെ വ്യാജവിളയാട്ടം ഇവിടെ നടപ്പില്ലന്ന് ചുരുക്കം. എന്ത് ക്രയവിക്രയം ആണെങ്കില്‍ തന്നെയും അതിനൊരു വിനിമയപ്പാട് ഉണ്ടാകും. അതായത് ആര് ആര്‍ക്ക് എപ്പോള്‍ എത്ര അളവില്‍ എന്താവശ്യത്തിന് കൊടുക്കുന്നു എന്നത്, ഒപ്പം അതിനൊരു വിനിമയ മൂല്യവും. ഇവിടെ ഡിജിറ്റല്‍ ഇടപാടിലെ കണിശമായ ഒരു പേരേട് പുസ്തകം അഥവാ ലഡ്ജര്‍ ആണ് ബ്ലോക്ക് ചെയിന്‍ സംവിധാനം. ബ്ലോക്ക് ചെയിന്‍ എന്നത് ഇനി വരും നാളുകളില്‍ ലോകത്തിന്റെ വിപണിഗതിയെ തന്നെ കീഴ്‌മേല്‍ മറിക്കാന്‍ പര്യാപ്തമായ സങ്കേതികത ആണ്, അതിന്റെ ഒരു ചെറിയ ഏര്‍പ്പാട് മാത്രമാണ് ഈ ബിറ്റ് കോയിന്‍. കുറച്ചൂടെ വ്യക്തമാക്കിയാല്‍ രാജ്യത്തെ വസ്തു ഇടപാട് മുഴുവനും ബ്ലോക്ക് ചെയിന്‍ രീതിയിലേക്ക് മാറ്റിയാലേ രജിസ്‌ട്രേഷന്‍ സാധ്യമാകൂ എന്ന ഒരു കല്ലേപിളര്‍ക്കുന്ന ആജ്ഞ വന്നാല്‍, സ്വിച്ചിട്ട പോലെ അതുമായി ബന്ധപ്പെട്ട ബിനാമി ഇടപാട് കുറയും, ഈ ബിനാമി വസ്തു ഇടപാട് മേല്‍ ഒഴുകിപ്പരക്കുന്ന ബ്ലാക്ക് മണി അതിന്റെ അവസാന നേര്‍ത്ത മണിനാദം കേള്‍പ്പിക്കുകയും ചെയ്യും. ബ്രസീല്‍, ജോര്‍ജിയ തുടങ്ങിയ രാജ്യങ്ങള്‍ ഈ വഴിക്ക് നീങ്ങിത്തുടങ്ങി എന്ന് വാര്‍ത്തകള്‍ ഉണ്ട്. വ്യാജപ്രമാണം നിലയ്ക്കും ഒപ്പം തന്നെ കൃത്യമായ മുദ്ര പത്രവരുമാനവും രജിസ്‌റ്റ്രേഷനും നടന്ന് സര്‍ക്കാരിന് വരുമാനം കൃത്യമായി കിട്ടും. അത് മാത്രമാണോ ആരുടെ വസ്തു എവിടെ, ആരില്‍ നിന്ന് ആര് എപ്പോള്‍ എന്ത് വിലയ്ക്ക് എപ്പോള്‍ വാങ്ങി എന്നത് സുതാര്യമായി പതിപ്പിക്കപ്പെടുകയും ചെയ്യും.
എങ്ങനെ: ബ്ലോക്ക് ചെയിന്‍ സങ്കേതത്തില്‍ പിയര്‍ ടു പിയര്‍ രീതിയില്‍ ഉപയോക്താക്കള്‍ തമ്മില്‍ നടക്കുന്ന ഇടപാടില്‍ ഇടനിലക്കാരന്റെ ആവശ്യമില്ല. സാധാരണ കറന്‍സിയില്‍ ബാങ്ക് അടക്കമുള്ള പല രീതികളും ഉണ്ട്. ഹര്‍വാഡ് ബിസിനസ് റിവ്യൂന്റെ പുതിയ ലക്കം പറയുന്നതിങ്ങനെ blockchain could dramatically reduce the cost of transactions and, if adopted widely, reshape the economy. ബ്ലോക്ക് ചെയിന്‍ എന്ത് എന്ന് വിവരിക്കുന്നത് കുറച്ച് സങ്കീര്‍ണമായ പ്രക്രിയ ആണ്, സ്വകാര്യത ഉണ്ട് അതിനൊപ്പം തന്നെ സുരക്ഷിത ഇടപാടും. ഒന്ന് മാറ്റിപ്പിടിച്ച് പറഞ്ഞാല്‍ സുരക്ഷാമുദ്രണം എങ്ങനെ എന്ന് അറിഞ്ഞല്ലല്ലോ സാധാരണ കറന്‍സി നോട്ടിന്റെ ഇടപാട് നാം നടത്തുന്നത്. ബിറ്റ്‌കോയിന്‍ അതാത് രാജ്യത്തെ കേന്ദ്ര ബാങ്ക് പുറത്തിറക്കുന്നതോ അനുവദിക്കുന്നതോ അല്ലാത്തതിനാല്‍ ഇതില്‍ വിശ്വാസം ഉള്ളവര്‍ തമ്മിലാണ് നിലവില്‍ കൈമാറ്റം നടക്കുന്നത്. അതായത് സാങ്കേതികമായി വിശ്വസിച്ചവര്‍ എന്ന് പറയാം. നാണയത്തിലും മുദ്രണ കടലാസിലും ജനങ്ങള്‍ക്ക് വിശ്വാസം പതിയെ വന്നത് പോലെ ഇവിടെയും സംഭവിക്കാം. അതായത് സങ്കേതം മനസിലാക്കുന്നതിനെക്കാളും വരും കാലം ഇതിന്റെ ഉപയോഗലാളിത്യത്തിലും മൂല്യസ്വീകാര്യതയും ആകും ജനങ്ങള്‍ നോക്കുക.
ഇതിന് ഭൗതികമായ കടലാസിന്റെയോ ലോഹനാണയത്തിന്റെയോ രൂപമില്ല, ഡിജിറ്റല്‍ ആണ് പുര്‍ണമായും. കൊടുക്കാനും വാങ്ങാനും ഇ-വാലറ്റും സൂക്ഷിക്കാനുമായി വോള്‍ട്ടിലും സാധിക്കും.
നിലവില്‍ വന്നിട്ട് ഏതാനും വര്‍ഷമേ ആയിട്ടുള്ളൂവെങ്കിലും മൂല്യം കാര്യമായി തന്നെ കുതിച്ചുയര്‍ന്നിട്ടുണ്ട്.
എവിടെ വരെ: ലഭ്യമായ കണക്കുകള്‍ അനുസരിച്ച് ക്രിപ്‌റ്റോകറന്‍സി ഉപയോഗിക്കുന്നവരുടെ എണ്ണം ദശലക്ഷം മാര്‍ക്ക് കടന്നിട്ട് നാളുകളായി, വളര്‍ച്ചാനിരക്ക് വച്ച് നോക്കുമ്പോള്‍ സാഹചര്യങ്ങള്‍ അനുകൂലമായാല്‍ ഇന്റര്‍നെറ്റ് വ്യാപിച്ചത് പോലെ തന്നെ ബ്ലോക്ക് ചെയിന്‍ സങ്കേതികസംവിധാനം സര്‍വ വിപണന വാണിജ്യ മാര്‍ഗങ്ങളിലും കടന്നെത്തും. കേവല ഒരു ഉദാഹരണത്തിന് പുസ്തക വിപണിയില്‍ അല്ലെങ്കില്‍ സംഗീതസിനിമാ രംഗത്ത് വ്യാജന്‍ (പൈറസി) ഉണ്ടാക്കുന്ന പൊല്ലാപ്പ് ആ വിപണിയുടെ ക്ഷയത്തിന് തന്നെ കാരണമാകുന്നു, ബ്ലോക്ക് ചെയിന്‍ സംവിധാനത്തിലേക്ക് മാറുന്നതോടെ പൈറസിക്ക് തടയിടാനും പറ്റും എന്നത് പെട്ടെന്ന് പറയാവുന്ന ഒരു സാദൃശ്യം. ബഹുരാഷ്ട്ര കമ്പനികള്‍ ഇതിനോടകം തന്നെ സങ്കീര്‍ണമായ സപ്ലെ ചെയിന്‍ സംവിധാനത്തെ നിരീക്ഷിക്കാനായി ബ്ലോക്ക് ചെയിന്‍ ഉപയോഗിച്ച് തുടങ്ങിയിട്ടുണ്ട്.
ഇന്ത്യയില്‍ ധനകാര്യ മന്ത്രാലയം ബിറ്റ്‌കോയിന്‍ പോലെയുള്ള ക്രിപ്‌റ്റോകറന്‍സി നിരോധിക്കണോ വേണ്ടയോ അതോ നിയന്ത്രിക്കണോ എന്ന കാര്യത്തില്‍ നിര്‍ദ്ദേശങ്ങള്‍ ക്ഷണിച്ചിട്ടുണ്ട്. ജപ്പാന്‍ സമീപകാലത്ത് ഇതിന് അനുകൂല നിലപാടെടുത്തിട്ടുമുണ്ട്, ഓസ്‌ട്രേലിയ സെല്‍ഫ് റെഗുലേഷന് പച്ചക്കൊടി കാട്ടുകയും ചെയ്തു.
പല രാജ്യങ്ങളിലും ഇത് നിയമം മൂലം നിരോധിച്ചിട്ടില്ല അതേസമയം തന്നെ അംഗീകരിച്ചിട്ടും ഇല്ല. ലോകം ഒരു ഗ്രാമമാകും എന്ന സങ്കല്‍പ്പത്തിന്റെ ആധാരശില ഒറ്റക്കറന്‍സി തന്നെയാണ്, അത് ബിറ്റ്‌കോയിന്‍ ആണോ അതോ മറ്റേതെങ്കിലും ക്രിപ്റ്റോ കറന്‍സിയോ എന്നുള്ളതിലേ തര്‍ക്കമുണ്ടാകാന്‍ വഴിയുള്ളൂ.
കലാശക്കൊട്ട്: ഈ കറന്‍സിയില്‍ ഒരു വിമുദ്രീകരണം (ഡിമോണിറ്റൈസേഷന്‍) വരാന്‍ ഉള്ള സാധ്യത ഇല്ലേയില്ല, കാരണം ഇത് രാജ്യാതിര്‍ത്തിയുടെ അധികാരത്തില്‍ ഒതുങ്ങുന്ന നിയതരൂപമല്ല.
(യൂണിയന്‍ ബാങ്ക് ഓഫ് ഇന്ത്യയില്‍ സീനിയര്‍ ടെക്‌നിക്കല്‍ മാനേജരാണ് ലേഖകന്‍)
No comments:
Post a Comment
Dont be shy leave your comments !