ചോ: ബിറ്റ്കോയിനെ കുറിച്ച്‌ ഈയിടെയായി ധാരാളം വാര്‍ത്തകള്‍ കേള്‍ക്കുന്നു. എന്താണ് ഈ ബിറ്റ്കോയിന്‍? എങ്ങനെയാണ് വാങ്ങാനാവുക? ബിറ്റ്കോയിനില്‍ നിക്ഷേപിക്കുന്നത് കൊണ്ട് എന്താണ് നേട്ടം?
സോന വര്‍ഗീസ്, മഞ്ചേരി
ഉത്തരം: കമ്ബ്യൂട്ടേഷണല്‍ അല്‍ഗോരിതം ഉപയോഗിച്ച് നിര്‍മ്മിച്ച ക്രിപ്റ്റോ കറന്‍സിയാണ് ബിറ്ര്കോയിന്‍. ഇതിനെ കറന്‍സിയായി ലോകത്തെ ഒരു രാജ്യവും ഇതുവരെ അംഗീകരിച്ചിട്ടില്ല. സാധാരണ രാജ്യങ്ങള്‍ പുറത്തിറക്കുന്ന കറന്‍സികളെപ്പോലെ ക്രിപ്റ്റോ കറന്‍സിക്ക് ഔദ്യോഗിക അംഗീകാരത്തിന്റെ പിന്‍ബലവുമില്ല. ഇപ്പോള്‍ ബിറ്റ്കോയിന്റെ വില കുതിക്കുന്നത് ഊഹക്കച്ചവടത്തിന്റെ അടിസ്ഥാനത്തില്‍ മാത്രമാണ്.
ഇന്ത്യയും ബിറ്റ്കോയിനെ അംഗീകരിച്ചിട്ടില്ല. അതേസമയം, ഇതിലെ വ്യാപാരം നിരോധിച്ചിട്ടില്ലാത്തതിനാല്‍ വിദേശത്ത് രജിസ്റ്റര്‍ ചെയ്ത ഓണ്‍ലൈന്‍ എക്സ്ചേഞ്ചുകള്‍ വഴി ഇന്ത്യയിലും ബിറ്റ്കോയിന്‍ വ്യാപാരം നടക്കുന്നുണ്ട്. എന്നാല്‍, വളരെ വലിയ റിസ്കുള്ള ഊഹക്കച്ചവടമായി മാത്രമേ അതിനെ കാണാനാകൂ.
ചോദ്യം: രണ്ട് - മൂന്നു വര്‍ഷം മുമ്ബ് ഫാര്‍മ ഓഹരികളാണ് വിപണിയില്‍ ഏറ്റവും മികച്ച പ്രകടനം കാഴ്ചവച്ചിരുന്നത്. എന്നാല്‍, ഒന്നു - രണ്ട് വര്‍ഷമായി ഫാര്‍മ ഓഹരികളില്‍ വലിയ ഇടിവ് കാണുന്നു. എന്താണ് ഇതിനു കാരണം? ഇപ്പോഴത്തെ നിലയില്‍ ഫാര്‍മ ഓഹരികള്‍ വാങ്ങാമോ?
സഞ്ജു ഭാസ്കര്‍, കോഴിക്കോട്
ഉത്തരം: 2010 മുതല്‍ 2015 വരെയുള്ള കാലയളവില്‍ അമേരിക്കയില്‍ നിലവിലുണ്ടായിരുന്ന 70 ശതമാനം ഔഷധങ്ങളുടെ പേറ്റന്റ് കാലഹരണപ്പെട്ടപ്പോള്‍ ജനറിക് മരുന്നുകള്‍ ഉത്പാദിപ്പിക്കാന്‍ ഫാര്‍മ കമ്ബനികള്‍ക്ക് അവസരം ലഭിച്ചതാണ് ഇവയുടെ ഓഹരികളുടെ കുതിച്ചു ചാട്ടത്തിന് വഴിതെളിച്ചത്. ഇതോടെ, ഈ ഓഹരികള്‍ ചെലവേറിയ നിലയിലുമായി. അമേരിക്കയിലെ ബിസിനസിലുണ്ടായ വളര്‍ച്ച സാധാരണ നിലയില്‍ ആവുകയും അമേരിക്കന്‍ ഡ്രഗ് റെഗുലേഷന്‍ അതോറിറ്റിയുടെ നടപടികള്‍ കാരണം പല ഫാര്‍മ കമ്ബനികളുടെയും വളര്‍ച്ച കുറയുകയും ചെയ്തതാണ് ഈ ഓഹരികളെ പിന്നീട് ഇടിവിലേക്ക് നയിച്ചത്.
വളരെ ചെലവേറിയ നിലയില്‍ നിന്ന് ഈ ഓഹരികള്‍ സാധാരണ നിലയിലേക്കും വന്നു. എന്നാല്‍, ഇപ്പോള്‍ ഫാര്‍മ കമ്ബനികള്‍ നേരിടുന്ന പ്രശ്നങ്ങള്‍ ഏതാണ്ട് പരിഹരിച്ച സ്ഥിതിയിലാണ്. ഈ ഓഹരികളുടെ മൂല്യവും ന്യായമായ നിലയില്‍ നില്‍ക്കുന്നു. ഈ സാഹചര്യത്തില്‍ ദീര്‍ഘകാല അടിസ്ഥാനത്തില്‍ ഫാര്‍മ ഓഹരികള്‍ വാങ്ങാവുന്നതാണ്.
ചോദ്യം: മ്യൂച്വല്‍ഫണ്ടുകളില്‍ ഹൈബ്രിഡ് ഫണ്ടുകള്‍ എന്നൊരു വിഭാഗം ഉണ്ടെന്നറിഞ്ഞു. ഇവ എന്താണെന്ന് വിശദമാക്കാമോ?
ഗണേഷ്, ഈരാറ്റുപേട്ട
ഉത്തരം: ഒന്നിലധികം ആസ്തി മേഖലകളെ പോര്‍ട്ട്ഫോളിയോയില്‍ ഉള്‍പ്പെടുത്തിയ ഫണ്ടുകളെ പൊതുവേ ഹൈബ്രിഡ് സ്കീമുകള്‍ എന്ന് പറയുന്നത്. സാധാരണ ഹൈബ്രിഡ് ഫണ്ടുകള്‍ കടപ്പത്രങ്ങളിലും ഓഹരികളിലുമായാണ് നിക്ഷേപിക്കുന്നത്. എന്നാല്‍, ഈ വിഭാഗത്തില്‍ പെടുന്ന ചില ഫണ്ടുകള്‍ ഓഹരിക്കും കടപ്പത്രത്തിനും പുറമേ സ്വര്‍ണത്തിലും നിക്ഷേപം നടത്തുന്നുണ്ട്.
ഹൈബ്രിഡ് ഫണ്ടുകളില്‍ ഓഹരി നിക്ഷേപത്തിന് പ്രധാന്യമുള്ള ഫണ്ടുകളും കടപ്പത്രത്തിലെ നിക്ഷേപത്തിന് പ്രധാന്യമുള്ള ഫണ്ടുകളുമുണ്ട്. സാധാരണ നിലയില്‍ വിപണിയിലെ ചാഞ്ചാട്ടങ്ങള്‍ ഒരു പരിധി വരെ ബാധിക്കാത്ത നിലയിലുള്ള റിട്ടേണ്‍ നല്‍കാന്‍ ഇത്തരം ഫണ്ടുകള്‍ക്ക് സാധിക്കുന്നുണ്ട്. വലിയ റിസ്ക് എടുക്കാന്‍ താത്പര്യം ഇല്ലാത്തവരും ഓഹരികളില്‍ ഭാഗികമായി നിക്ഷേപിക്കാന്‍ ആഗ്രഹമുള്ളവരുമായ നിക്ഷേപകര്‍ക്ക് ഹൈബ്രിഡ് ഫണ്ടുകള്‍ പരിഗണിക്കാവുന്നതാണ്.
ഓഹരി വിപണി വളരെ ഉയരത്തില്‍ ആയതിനാല്‍ ഇക്വിറ്റി ഫണ്ടുകളില്‍ മാത്രമായി നിക്ഷേപിക്കുന്നതില്‍ വലിയ റിസ്കുണ്ടെന്ന് കരുതുന്ന നിക്ഷേപകര്‍ക്കും ഹൈബ്രിഡ് ഫണ്ടുകള്‍ തിരഞ്ഞെടുക്കാവുന്നതാണ്.
(courtesy: daily hunt)
No comments:
Post a Comment
Dont be shy leave your comments !